Արցախյան 44–օրյա պատերազմի երկրորդ տարելիցին Շուշիի տեխնոլոգիական համալսարանի ուսանողներն ու պրոֆեսորադասախոսական կազմը՝ ռեկտոր Նվեր Միքայելյանի գլխավորությամբ, Ստեփանակերտի Սուրբ Հակոբ եկեղեցում մասնակցել են 44-օրյա պատերազմում նահատակված հերոսների հոգեհանգստյան կարգին:
Լռության րոպեից հետո եկեղեցու զանգերի ղողանջների ներքո համալսարանականները մասնակցել են խաչերթին, որի մասնակիցները մայրաքաղաքի կենտրոնական փողոցներով քայլել են դեպի հուշահամալիր՝ ձեռքերում պահելով պատերազմում զոհվածների նկարները:
Համալսարանականները զինվորական պանթեոնում մասնակցել են «Լուսո խորան» հուշակոթողի օրհնության կարգին և հարգանքի տուրք մատուցել 44-օրյա պատերազմում զոհվածների հիշատակին:
2020 թվականի սեպտեմբերի 27-ին Ադրբեջանի կողմից սանձազերծված պատերազմի հետևանքով Շուշիի տեխնոլոգիական համալսարանի 54 ուսանող սեփական կյանքն է զոհաբերել Արցախի ազատության համար․ «Շուշիի տեխնոլոգիական համալսարանի մեր հերոսները պարտքի գերագույն գիտակցումով էին մեկնել զինվորական ծառայության և անսասան կանգնած էին հայրենիքի պաշտպանության դիրքերում։ Մեր քաջերը դա ապացուցեցին իրենց սխրագործությամբ ու անկոտրում կամքով»,-նշել է բուհի ուսումնագիտական աշխատանքների գծով պրոռեկտոր Ռոզա Ավագյանը։
ՇՏՀ լրատվական բաժին
